ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា លោកឧបនាយករដ្ឋមន្ត្រី ហង់ជួន ណារ៉ុន បានថ្លែងឱ្យដឹងថា ក្រសួងអប់រំមិនទាន់សម្រេចជាផ្លូវការថាសិស្សជាប់និទ្ទេស A, B, C ជាប់ជាគ្រូដោយស្វ័យប្រវត្តិនៅឡើយទេ។

ថ្លែងនៅក្នុងសន្និសីទសារព័ត៌មាននៅថ្ងៃទី២៧ ខែតុលា ឆ្នាំ២០២៣ ស្តីពីដំណើរការរៀបចំប្រឡងប្រឡងបាក់ឌុប ឧបនាយករដ្ឋមន្ត្រី ហង់ជួន ណារ៉ុន បានបញ្ជាក់ដូច្នេះថា៖ «ដោយឡែកការកំណត់ថាឱ្យសិស្សនិទ្ទេស A, B, C ជាប់ជាស្វ័យប្រវត្តិយើងមិនទាន់មានការសម្រេចជាផ្លូវការទេវាគ្រាន់តែជាគោលការណ៍ ប៉ុន្តែគឺចង់ឱ្យអ៊ីចឹង»។

លោករដ្ឋមន្ត្រីក្រសួងអប់រំបន្តថា៖ «ក៏ប៉ុន្តែជាគោលការណ៍របស់រាជរដ្ឋាភិបាលគឺចង់ឱ្យមានការប្រឡងដើម្បីឱ្យសិស្សហ្នឹងបង្ហាញពីសមត្ថភាពខ្លួនឯង ជួនកាលគាត់ប្រឡងបាក់ឌុប គាត់រាងធ្លាក់ពិន្ទុ ហើយបើគាត់ខំរៀនបន្តហើយទៅប្រឡងគ្រូ ពិន្ទុអាចបានល្អជាង ដោយសារការប្រឡងគ្រូ គឺខុសពីការប្រឡងសញ្ញាបត្រមធ្យមសិក្សាទុតិយភូមិ»។

លោករដ្ឋមន្ត្រីអះអាងថា គោលការណ៍នេះមុននឹងសម្រេចដាក់ចេញ គឺត្រូវមានការថ្លឹងថ្លែងយ៉ាងហ្មត់ចត់៕